Cassa in Sardigna, aprovadu su calendàriu venatòriu 2020/2021. S’assessore Lampis: “Allega ùtile meda cun is cassadores”

Su comitadu regionale pro sa fàuna at aprovadu su calendàriu venatòriu 2020/2021. Si cumentzat giòbia su 3 de cabudanni cun sa cassa a sa tùrtura (segunda e ùrtima die su 6 de cabudanni), a sa corraga murra e a sa marapiga. Pustis, dae domìnigu su 20 de cabudanni, is castas de cassare ant a èssere: anade concairde, anadone, busine, anade coa ruja, pudda de abba, circuredda, beccaccinu, méurra, guàglia, anade marina. Pro sa beccàccia, su trudu de s’olieddu, su trudu suarinu, su tidori e su margiane tocat a isetare giòbia su primu de mese de ladàmine. Cassa a s’alàuda dae domìnigu su 4 de ladàmine,a su piulaghe dae giòbia su 15 e a su sirbone dae su 1 de onniasantu. Pro s’abertura de sa cassa a su lèpore sardu, a sa perdighe sarda e a su conillu areste tocat isetare is resurtos de is tzensimentos istadiales: is datos ant a èssere elaborados, comente s’annu coladu, intro su 20 de cabudanni.

“Est su frutu de is atividades chi sunt una prioridade pro sa Giunta regionale, giai dae su cumentzu de sa legisladura” gasi sutalineat s’assessore a sa Defensa, Gianni Lampis- “amus cumentzadu a fàghere is tzensimentos netzessarios, in su territòriu liberu, e finas in is àreas gestidas, gràtzias a su traballu de su Corpus Forestale e de s’agentzia Forestas. In prus de su lèpore e de sa perdighe, su tzensimentu ocannu, at a interessare finas su conillu areste.”

Sa serrada de s’istajone de sa cassa est fissada pro su 31 de ghènnargiu 2021 francu pro s’alàuda, sa mèurra, sa guàglia antitzipada a su 31 de mese de idas, sa beccàccia giòbia su 28 de mese de idas, pro corraga murra, tidori e marapiga, tirada a longu finas a mèrcuris su 10 de frèargiu 2021.

Artìculos creados 160

Artìculos assotziados

Cumintza a iscrìere su foeddu chi boles chircare e incarca inviu. Incarca ESC pro annullare.

Torra in susu