Su 30 de austu de su 1802 beniat mortu dae is sabojas Frantziscu Cilocco, patriota e rivolutzionàriu sardu

Frantziscu Cilocco fiat nàschidu in Casteddu su 20 de su mese de idas de su 1769. Fiat unu notàriu e peri un’oposidore republicanu antifeudale e anti-piemontesu. Su caràtere suo forte e seguru, su carisma, s’inteligèntzia e is dodas bonas de oradore, dd’aiant portadu a èssere unu de is printzipales autores de sa luta de liberatzione natzionale de sa Sardigna de cussu tempus. Fiat un’òmine chi non si faghiat corrùmpere e chi non si bendiat, pro ite sa fide patriòtica sua fiat pura e sintzera.

Peri issu aiat pigadu parte a is avolotos anti-piemontesos de su 28 de abrile de su 1794, cando totus is italianos chi s’agataiant in Sardigna fiant istados acapiados, impresonados e bogados dae s’ìsula. Dae cussa data Cilocco aiat cumentzadu a tènnere una parte de importu mannu in custu perìodu rivolutzionàriu. In su mese de idas de su 1795, su 27, difatis, paris a un’àteru eroe natzionale sardu, Giuachinu Mùndula, cumandat un’esèrtzitu de 13 mìgia sardos chi beniant dae totu su Logudoro e ponet suta assèdiu sa tzitade de Tàtari pro more de impresonare is feudatàrios. Gràtzias a s’agiudu de is massajos tataresos, “li zappatori”, is portales de is muros chi inghiriaiant sa tzitade fiant istados abertos, a pustis de duas dies de assèdiu. Cilocco fiat istadu retzidu dae sa populatzione tataresa in sa Posta Noba cun grandu festa e cuntentesa, ma is meres, is canes papadores piemontesos, nche dd’aiat fata a si fuire sa note a in antis colende fatu de is camineddos suterràneos chi passaiant a suta de sa tzitade.

A sa coa, comente ischimus totus, sa rivolutzione fiat andada male e is protagonistas de is avolotos, is patriotas sardos, fiant istados totus persighidos dae is sabojas cumandados dae Placido Benedetto de Savoja, Conte de Moriana e dae su frade, su vitzerè de Sardigna Carlo Felice, totus e is duos carrales de su Re de Sardigna Carlo Emanuele IV.

A pitzu de sa conca de Cilocco is Piemontesos aiat postu unu tallione de milli iscudos e pro cussu fiat pregonadu e apretadu che sirbone. In su mese de làmpadas de su 1802 chircat de fàghere un’ùrtimu isfortzu pro formare sa Repùblica Sarda indipendente. Paris cun su patriota Frantziscu Sanna Corda e medas àteros disterrados armados dae conca finas a pees chi lompiant dae sa Còrsica, aiat isbarcadu a s’iscuridu a presu de is turres de guàrdia de Vignola e Longone pro ddas pòdere ocupare. Ma curpa de su bandidu gadduresu Mimmia, chi ddos aiat traitos, peri cussu custu tentativu fiat andadu male!

Su primu a èssere mortu, fiat istadu Sanna Corda, fertu dae is ballas isparadas dae is sordados sabàudos. Su 25 de argiolas Cilocco fiat istadu atzapadu dae is piemontesos, ma diat èssere istadu mègius si s’esseret mortu, pro ite totus cussos chi non moriat in su campu de batalla, subiant torturas de ogna genia a in antis de èsserent cundennados a morte. A Cilocco difatis dd’aiant poderadu acapiadu pro unas cantas dies a su mugru de una mata, sena pòdere bufare e nemmancu papare. Posca dd’aiant leadu a sa brallina a Tèmpiu sètzidu a pitzu de unu molente, pro èssere pigadu in giru e iscutu dae sa gente. Dae Tèmpiu nche dd’aiant acumpangiadu, semper a calas de fuste e befadu de totus is passantes, finas a Tàtari, acanta dd’aiant fatu su dibatimentu.

In custa tzitade, in ue immoe puru si costumat a nàrrere pro frastimu «La fini di Checco», sa fine de Frantziscu Cilocco, fiat arribbadu su 9 de austu de su 1802, in mesu a sa gente chi ddu pistaiat e ddu ispudaiat e ddi naraiat ogna faeddu malu. In tribunale su giùighe dd’aiat donadu sa cundenna màssima, sa pena de morte. Primu de l’ochìere, però, si ddoe fiant vengados e dd’aiant torturadu e tratadu peus de un’animale. Su giùighe difatis dd’aiat cundennadu a sa tortura de sa fune, de is tenàgias tentas in fogu e a sa fustigatzione. Sa tortura de sa fune cunsistiat a dd’acapiare is manos a palas e a ddu tirare in artu cun una tegiola e poi a ddu lassare andare cun un’iscuta forte pro nde ddi iscravare totu is mermos e is artes. Sa cundenna de is tonallas buddidas cunsistiat a ddi passare is ferros in totu sa carena e a ddi segare unu bucone de carre a sa bia: a in antis is simingiones, posca is ungras, poi is didos e sa petza bia. Sa fustigatzione cunsistiat a dd’atzotare cun unu tzirònia tèssida de prumu. Pro more de is caladas de fuste nde ddi essiat sa pedde a tzàpules.

Ma custu a is piemontesos non ddis bastaiat. Difatis a pustis de èssere istadu mortu e brusiadu, e su chinisu suo ispainadu in s’àera, is piemontesos aiat allogadu sa conca de Cilocco e dd’aiant posta bene a craru in s’intrada de Tàtari, in Posta Noba, comente ameletzu pro is àteros patriotas sardos.

Frantziscu Cilocco teniat 33 annos. Custu patriota, a 218 annos dae sa morte sua, nos at lassadu una eredidade manna a beru: s’amore pro sa libertade. Nois sardos amus a dèpere semper onorare e tènnere a mente su sacrifìtziu de custu òmine mannu de Sardigna.

Disegno di Emanuele S. Konflitto Mossa

http://www.fondazionesardinia.eu/ita/wp-content/uploads/2019/12/zzzzzcilocco1111.jpg
Artìculos creados 90

Lascia un commento

Il tuo indirizzo email non sarà pubblicato. I campi obbligatori sono contrassegnati *

Artìculos assotziados

Cumintza a iscrìere su foeddu chi boles chircare e incarca inviu. Incarca ESC pro annullare.

Torra in susu