Sa pedra votiva de Santa Maria

Sa chi naramus “Pedra Votiva”, posta a paga distàntzia dae sa crèsia de s’Assunta, est unu repertu archeològicu prenuràgicu, sa datatzione prus probàbile dda narat de su neolìticu. Misteriosa e incantadora testimonia de ritos religiosos de is antepassados, sa pedra votiva documentat insediamentos umanos antigos a beru in sa zona.

Agatada acanta de sa crèsia in su 1955, durante is traballos de fàbricu de su muru de su sagradu, sa pedra fiat istada posta, a printzìpiu, in pees de su muru costruidu ex novo. Solu a pustis est istada iscostiada, e sistemada ue s’agatat como, in su marciape’ chi mirat a sa marina tzentrale, dae in antis a s’iscala chi lompet a su sagradu de sa crèsia de Santa Maria, gasi chi siat visìbile bene e a disponimentu de totus is visitadores de sa bidda de costera. “Massu erràticu a copellas”, gai est definidu dae is archeòlogos custu massu granìticu divènnidu in su tempus unu de is sìmbulos de Santa Maria Navarresa. Est de unu blocu de pedra de forma truncu-piramidale, cun una superfìtzie caraterizada dae una sèrie de ùndighi “forreddos”, naradas copellas.

Is istudiosos sunt cunvintos chi massos gai traballados diant pòdere àere tentu sa funtzione de altares sacrificales, mancari in ocasione de cultos votivos particulares chi previdiant ofertas a is divinidades. Segundu tzertos istudiosos sa pedra votiva de Santa Maria Navarresa leat parte in sa tipologia de is “molas comunes”, chi teniant unu ruolu tzentrale in rituales sotziales e religiosos importantes, durante custos ritos, cun probabilidade in ocasione de iscadèntzias significativas collegadas a is istajones e a is tziclos produtivos, si moliat pro frigamentu su sede, su laore. Sa frontera de pitzu de su monumentu presentat una superfìtzie irregulare de ùndighi tuveddas (couvettes o pregadorias), realizadas in negativu a totu longu in s’ala de s’oru de sa fatza superiore a vista.

Semper durante is traballos de su 1955 (a dolu mannu no documentados in manera adeguada dae relatos pùblicos de is iscavos) a s’internu de sa crèsiaa probe de s’altare majore, est istadu agatadu unu relichiàriu minore de prata (dimensiones bator tzentìmetros pro bator, a forma de coro). Su relichiàriu, istuvadu e indoradu a parte de intro (teniat in intro ossos de unu santu galu disconnotu) presentat in foras un’iscrita in àrabu. S’iscrita in àrabu in unu reliquiario cristianu non depet pàrrere cosa rara, chi su ritu cristianu in limba àraba fiat praticadu in sa penìsula ibèrica, durante is sèculos longos de sa “Reconquista”, dae is cristianos chi si fiant arabizados atzetende leges, costùmenes e limba de is conchistadores.

crèditos e fotos dae turismobaunei.eu

Artìculos creados 222

Artìculos assotziados

Cumintza a iscrìere su foeddu chi boles chircare e incarca inviu. Incarca ESC pro annullare.

Torra in susu