S’ogiastru millenàriu de Santa Maria Navarresa

A costados de sa crèsia de Santa Maria Navarresa si pesat unu grandiosu ogiastru millenàriu, chi segundu is espertos de botànica aiat giai coladu, cun probabilidade manna, su millènniu de vida cando, segundu sa traditzione, sa Printzipessa de Navarra fiat lòmpida a custas alas in su 1052. Sa mannària de custu ogiastru est de cunsideru, non solu pro s’artària, belle 10 metros, ma finas pro sa tzircunferèntzia de su truncone, 8 metros e 40 cm (mesurada a 1 metru e 30 cm dae terra). Custas dimensiones nde faghent unu de is ogiastros prus imponentes de totu Itàlia e non pro nudda custu esemplare, paris cun is àteros ogiastros de sa pratza a fundu de sa crèsia, est istadu decraradu “Monumentu naturale”, cun initziativa de sa Regione Sarda, in ghennàrgiu de su 1994.

In antis, in Baunei, fiat traditzione prodùere s’ògiu santu pròpiu dae su sèmene de ogiastru. Finas a is annos Chimbanta, in is dies de sa festa de s’Assunta, a s’umbra de s’ogiastru millenàriu fiat traditzione de is masellajos de Baunei a pònnere su bancu, pro s’ocasione fiant autorizados a bèndere sa petza in su pratzale de sa crèsia. Pro more de is acòrdios istabilidos a metades Otighentos, is masellajos de Lotzorai podiant imbetzes sistemare su bancu issoro solu a carchi chentina de metros prus a giosso de sa crèsia, in sa làcana tra is duos territòrios cumonales.

S’istadu vegetativu de su  Ogiastru Millenàriu est bastante bonu como, fintzas si su truncu est istuvidu in parte. Unos arrastos de fogu chi giughet su truncu sunt datados a su 10 de freàrgiu de su 1968, cando fracas de orìgine dolosa ant iscalabradu s’àrbore, gràtzias a deus no in modu grave. S’episòdiu est significativu e mèritat de èssere contadu, fintzas pro ite dimustrat s’atacamentu de sa populatzione locale a custu patriarca arbòreu. A fine de is annos Sessanta su nùcleu abitativu printzipale de Santa Maria fiat acanta de su  “Hotel Agugliastra”, inauguradu carchi annu in antis, e in cara a cussas pagas domos bi fiat una de is firmadas de su postale de lìnia chi collegaiat is biddas de su pianu a cussas de su monte. A merie tardu de cussu 10 freàrgiu, dae sa firmada de su postale calicunu s’est abbigiadu chi s’ogiastru fiat tenende a fogu e at donadu s’allarme. In pagos minutos deghinas de persones fiant a inghìriu de sa mata armadas cun istèrgios de abba arreprenos in sa funtana serente, e gràtzias a custu interventu lestru su printzìpiu de fogu est istadu istudadu deretu.

S’identidade de su piromane, chi cun custa mòvia malàida, su 10 de freàrgiu de su 1968, at arriscadu de reduire in chinisa su  Ogiastru Millenàriu de Santa Maria Navarrese, no est mai istada atzertada.

crèditos e fotos de turismobaunei.eu

Artìculos creados 222

Artìculos assotziados

Cumintza a iscrìere su foeddu chi boles chircare e incarca inviu. Incarca ESC pro annullare.

Torra in susu