Sa Regione istàntziat 8 milliones pro s’arriscu idràulicu, comunicadu de Solinas

Casteddu, 20 de santandria



Sa Giunta regionale istàntziat 8 milliones de èuros, 4 pro s’annualidade 2020 e 4 pro s’annualidade 2021, in favore de is Comunos pro sa definitzione de su retìcolu idrogràficu, sighende su chi is normas pro s’atuatzione de su Pianu pro s’assetu idrogeològicu aiant istabilidu.
Su retìcolu idrogràficu, cantu chi siat aprovadu dae s’Autoridade de distretu, at èssere su riferimentu printzipale pro is istùdios de aprofundimentu de s’assetu idrogeològicu e pro interventos eventuales in àreas a arriscu idràulicu e de franas; in prus at a contribuire de manera importante a permìtere is previsiones, reduinde disacatos tìpicos de un’undamentu.

“Cun custa mesura de sustennu ulteriore a is Comunos chircamus de otènnere seguresa prus arta pro abbasciare s’arriscu e aumentare sa resilèntzia de is territòrios in àreas a arriscu majore – ispiegat su Presidente Solinas – S’istòria de Sardigna, cussa reghente a manera particulare, nos at imparadu chi dae in antis de fenòmenos dolorosos che undamentos e franas, paris cun sa posta in seguresa est fundamentale a orire totus is trastos de istùdiu e iscumbata chi serbant a pianificare e prevenire. Sa regione est impignada in manera cuncreta in una atzione de importu pro tutelare is territòrios cun s’obietivu primàriu de amparare s’incolumidade de is persones e abbasciare a su mìnimu is disacatos a is benes, a is atividades econòmicas e a su patrimòniu architetònicu e culturale de is comunidades amenatzadas dae is fenòmenos de dissestu idrogeològicu” at naradu su Presidente.

Sa programmatzione finantziària detzìdida in s’ùrtima setziada de Giunta est istada de sustennu a is Comunos pro su chi riguardat sa gestione de su PAI e naschet dae s’esigèntzia de aprontare unu retìcolu idrogràficu de riferimentu pretzisu e su prus pretzisu possìbile a sa realidade e a s’istadu de su logu, pro isòlvere e superare situatziones betzas, ispetzialmente pro is rios chi apant tentu modìficas dae eventos naturales  o de disviu e derivatzione. Custas sunt manifestatziones de incoerèntzia chi bolent currègidas, sinono sighint a batire problemas in sa definitzione de is àreas. Sa verìfica de su retìcolu idrogràficu in cada territòriu comunale at a serbire pretzisamente pro aprofundire mègius su cuadru de connoschèntzia de s’assetu idràulicu e idrogeològicu de su territòriu e at a apermìtere de tènnere informatziones e datos ùtiles pro agatare, modificare o cunfirmare is àreas a arriscu idràulicu, chi sunt elementos de importu in sa disciplina giusta de su PAI

Is contributos ant a èssere erogados in tres partes: sa prima (50%) perfetzionende is provedimentos contàbiles de impinnu de is summas; sa de duas (25%) trasmitinde a su Distretu idrogràficu de Sardigna is documentos, verìficas e cartografia de su retìcolu idrogràficu revisionadu (intro ses meses dae su primu acontu); sa de tres (25%) cantu chi sa documentatzione siat validada.

Comunicadu publicadu in su giassu de sa Regione.

Artìculos creados 222

Artìculos assotziados

Cumintza a iscrìere su foeddu chi boles chircare e incarca inviu. Incarca ESC pro annullare.

Torra in susu