Argea divenit organismu pagadore sena intermediàrios, su comunicadu de s’Assessoradu de s’Agricultura

Semus lompende a sos tèrmines istabilidos pro sos pagamentos de sos finantziamentos a su cumpartu de s’agricultura e at a èssere Argea, pro primu borta, a erogare diretamente sos contributos.
Su comunicadu de s’Assessoradu de s’Agricultura:


Casteddu, 25 santandria 2020 –

Sunt lompende sos primos pagamentos a sos massajos dispostos dae Argea in calidade de organismu pagadore de sa Regione Sardigna. In custas dies si sunt eroghende, respetende s’iscadèntzia de su 30 santandria imbeniente, sos antìtzipos de sas dimandas presentadas dae 13.345 benefitziàrios, pro unu totale de 57 milliones 234.961 èuros, de sas medidas connètidas a superfìtzies e a animales 10, 11 e 14 de s’annualidade 2020 de su Programma de isvilupu rurale.

“Su ruolu de organismu pagadore regionale de Argea – sutalìniat su presidente de sa Regione, Christian Solinas – nos cunsentit de gestire diretamente sas resursas mannas comunitàrias, in unu raportu immediatu cun sa Cummissione europea, e de allestrare sos pagamentos, a benefìtziu mannu de sos massajos nostros e de totu su cumpartu. In unu cuntestu chi faghet prus forte s’autonomia de sa Regione, sigamus gasi in su percursu de semplificatzione amministrativa e allebiamentu de sa burocratzia, duos de sos obietivos chi custa Giunta s’est donada dae printzìpiu”.

“Unu resurtadu importante – cummentat s’assessore regionale de s’Agricultura, Gabriella Murgia – segudadu nointames sas milli dificultades causadas dae un’apretu sanitàriu e econòmicu chi s’est perlonghende dae meses, otentu gràtzias a su traballu de iscuadra mannu de s’Assessoradu, de sa dirigèntzia e de totu su personale de Argea, a pustis de su reconnoschimentu de organismu pagadore regionale acontèssidu su 16 santugaine coladu. Amus crèidu cun detzisione in custu ruolu nou de s’Agèntzia, chi at a tènnere semper de prus una rilevàntzia istratègica a amparu de sos massajos nostros”.

Artìculos creados 222

Artìculos assotziados

Cumintza a iscrìere su foeddu chi boles chircare e incarca inviu. Incarca ESC pro annullare.

Torra in susu